يا أحباب البحلنا شنو..؟

د. علي الكوباني

حبا وكرامة
علي الكوباني
يا أحباب البحلنا شنو..؟😠
كلما يشيلو كوز ويعينوا مكانو زول..بعدها يطلع الجديد تراهو كوز ليهو ضنب🐒😫
يجيبوا حمدوك في اجتماع دولي(قيل مع البنك الدولي) يطلعوا ليك في الصورة في كوز قاعد ركن ويتبّسم😲
كمان وزير العدل يسافر لاجتماعات حقوق الانسان ..يثبتوا ليك انو في وفدو كوز وامنجي كمان(اسوأ خلطة)😠
ـ هووويي يا ناس السيادي وحمدوك ومجلس الوزراء وناس ق ح ت..احب اقول ليكم بعض الكلمات:
ـ الشغل الني ده بضيع ثورة مهرت بدماء غالية وارواح نبيلة..😠
ـ بعدين انت الواحد فيكم لا ساحر ولا حاوي..عشان يقول بشتغل بنفس الطاقم الموجود في الوزارات والمؤسسات وده اصلا اغلبو كيزان غير مؤهلين من ناس التمكين وفي حماك ربنا😏
ـ معقول البلد دي عدمت الناس المؤهلين عشان كلما تشيلوا كوز تجيبوا محلو كوز اردأ وأخسا منو ولمن كمان مصدي ومكدب..😠
ـ الكوز الصالح ما في الا في افلام الخيال الغير علمي..😏
ـ بعدين الكوز ممكن يكذب وينجر اي شي في سبيل تنظيمو الفاسد..واتذكر زمان في الجامعة (وانا كنت راس هوس..بس برئ وحات الله سيدي😌) ..جوني في الغرفة في الداخلية اتنين من دهاقنة الكيزان عشان يجندوني في التنظيم..وكان فيهم واحد يعتبر امير مجمع الطب والصيدلة والاسنان(حسب الرتب الكيزانية وقتها)..اها بعد ما قرا لي قراية جد..وطلس تقيل ..وشي آيات وأحاديث وشي عن انو ممكن احوالك ذااتا تتصلح..😉..اي والله..(وقع ليكم) ..وبعد ما سمعت العرض الجميل حقهم..قلت ليهو لكن انا زول بتاع غنا وطرب وكده..طوالي قال لي: ومالو يا كوباني (إن الله يحب المسلم الطروب😲)..قلت ليهو ..اجي يااااا شيخنا..دي بالغت فوكااا🤣..
ـ الكوز التائب زي الضرس المسوس شديد ..لا بد يرجع لعفانتو ويقوم عليك ويتاورك بالليل وبدخلك في ضيقة وجقلبة وهجلبة وجرسة وتقعد تكوس للقرنفل والتمباك..😏
ـ لو فيكم زول بحب ليهو كوز او كان قريبو او صحبو ..بالله بطريقتو.. يتصور معاهو سيلفي او يعزموا في مطعم الساحة ما شغلتنا ..لكن ما يجيبوا في منصب يمغص بيهو اهل الشهداء وشباب الثورة..😠
ـ نصيحة طبية شرعية: ثلاثة حاجات لا أمان لها وأعمل حسابك منها شديد:
1ـ اوعك تقرب من الكهرباء وانت مبلول وتعمل فيها معلم وانك بتعرف السالب من الموجب(او بلغة اهلنا في المنطقة الصناعية الارضي والماس)..لأنو يا سجمان جلد الانسان الجاف هو البقاوم دخول التيار الكهربائي لجسم الانسان..اما الجلد المبلول مقاومته للكهرباء قليلة جدا جدا وأقل تيار بعمل ليك خروج بدون عودة..😰
2ـ ابعد من العوم في القيفة الجنب كماين الطوب في بحر ازرق..لأنو يا دهل ممكن عادي تعمل فيها كيجاب ..لكن بتلقى الحته عميقة جدا(وما فيها حدّود لتحت) وتنزل زي الحجر..وكمان العجب لو لاقتك (سمكة بردة) تديك بوسة كهربائية وتتخشب جوه الموية..وتغرق وتموت موتة مُرة خلاص😰
3- لمن يكون السحاب تقيل وقريب للارض⛈🌩..والرعود ضاربة والبروق نازلة…ألزم بيتك وخليك قاعد في نص الاوضة ولا حتى جنب الشباك ذاتو..لأنو البراق ده عبارة شحنة كهربائية وتيارها فوق المليون امبير⚡..بعدين تيار البراق التفافي… يعني ممكن عادي يدخل ليك بخرم المفتاح ويكهربك حتى لو دخلت غرفتك وعايز تقفلها وانت ماسك المفتاح من جوه ويجهجه حنانك ويوديك في ود ام.جِبو..💀😭
# (اها شفتوا الثلاثة حاجات الخطيرة الفوق دي..؟..قريتوها كويس..؟
علي النعمة اخطر منها الكوز العامل فيها بحب ثورة ديسمبر المجيدة وانو عاشق للمدنية والديمقراطية😒😠)..
جدعة اخيرة:
لاقاني تصريح لكيزان الشعبي قبل كم يوم في احدى الصحف عن د.محمد ناجي الاصم (احد ايقونات الثورة ومستقبل السودان)..وقالوا فيما معناهو أنو كيسو فاضي ساكت وما عندو حاجة..وعبارة عن غلاف بس..وسماحة جمال الطين😲
اها عليكم الله لاقاكم هبل وخطل وهضربة زي دي…؟
غايتو ياها ذاااتا غيرة نفيسة المدغلبة..القالت نحن يدونا (الجلحات والكدوم الشينات)..وحمد ود المبروكة يدوهو (الغمازات والعيون السمحات) بِسس😏🤣